Жаңаша әдіс-тәсілдерді пайдалану арқылы бастауыш сынып оқушыларының функционалдық сауаттылығын дамыту

Қазіргі білім беру жүйесінің басты мақсаты – оқушыны тек біліммен қаруландыру емес, алған білімін күнделікті өмірде тиімді қолдана алатын, өз ойын еркін жеткізетін, шешім қабылдай алатын тұлға қалыптастыру. Осы тұрғыда бастауыш сынып оқушыларының функционалдық сауаттылығын дамыту – маңызды міндеттердің бірі болып табылады.

Функционалдық сауаттылық дегеніміз – оқушының оқығанын түсінуі, ақпаратты талдай алуы, оны өмірлік жағдаяттарда қолдана білуі. Бастауыш сыныпта бұл дағдылардың қалыптасуы оқушының алдағы оқу жетістіктерінің негізін қалайды. Сондықтан сабақ барысында жаңаша әдіс-тәсілдерді тиімді пайдалану ерекше маңызға ие.

Сабақта қолданылатын «Екі таяқша» әдісі оқушыларды нақты әрі қысқа жауап беруге үйретсе, «Төрт сөйлем» әдісі мәтінді терең түсінуге, негізгі ойды анықтауға және қорытынды жасауға көмектеседі. Ал тұжырым кестесі арқылы оқушылар ақпаратты салыстырып, талдау дағдыларын дамытады.

Сонымен қатар Эйлер шеңбері әдісі ұғымдар арасындағы ұқсастық пен айырмашылықты анықтауға мүмкіндік береді. «Балық қаңқасы» (Фишбоун) әдісі мәселенің себебі мен салдарын анықтап, оқушының сыни ойлау қабілетін жетілдіреді. Бұл әдістер оқушылардың белсенділігін арттырып, өз бетімен жұмыс жасауына жағдай жасайды.

Жаңаша әдіс-тәсілдерді қолдану барысында оқушылардың шығармашылық қабілеті дамып, білім алуға деген қызығушылығы артады. Мұғалім мен оқушы арасындағы ынтымақтастық күшейіп, сабақ үдерісі нәтижелі бола түседі.

Қорытындылай келе, бастауыш сыныпта жаңаша әдіс-тәсілдерді жүйелі әрі мақсатты қолдану оқушылардың функционалдық сауаттылығын дамытып, олардың өмірге бейім, жан-жақты тұлға болып қалыптасуына ықпал етеді